23. júní 2016 ákváðu Bretar í þjóðaratkvæðagreiðslu að Bretland væri betur sett utan Evrópusambandsins, efnahags- og stjórnmálalegs ríkjasambands sem Bretar áttu þó ríkan þátt í að stofna og síðan móta um áratugaskeið. Tæp 52 prósent voru fylgjandi útgöngu en rétt rúmlega 48 prósent vildu áframhaldandi aðild.
Tíu árum síðar hefur þetta snúist rækilega við. Af könnunum má ráða að meirihluti Breta telji Brexit hafa verið mistök, -ferlið allt hafa verið óttalegt klúður og að Bretland standi hallari fæti nú en áður. Í könnun sem birt var fyrr í þessum mánuði sögðust sextíu og eitt prósent aðspurðra óánægð með útgönguna og eftirleik hennar en einungis tólf prósent voru ánægð með stöðu mála.
Í sömu könnun sögðu 57 prósent Brexit hafa verið mistök, þar á meðal 23 prósent þeirra sem kusu með því á sínum tíma. Og 55 af hundraði styðja og vill að Bretland gangi aftur í Evrópusambandið - með ákveðnum skilyrðum þó.
Bresku hagfræðistofnuninni reiknast til að þjóðarframleiðslan sé nú sex til átta prósentum minni - og meðalbretinn þar af leiðandi allt að átta prósentum fátækari - en ef landið væri enn innan vébanda ESB, og breskir hagfræðingar eru langflestir á því að Bexit hafi valdið Bretum umtalsverðu tjóni.
Sannfærður um að Bretland gangi aftur í ESB á næstu árum
Jón Daníelsson prófessor við London School of Economics tekur undir þetta. Í viðtali í Speglinum fer hann yfir aðdraganda Brexit og margvísleg eftirköst þess. Hann er sannfærður um að eftir önnur tíu ár verði Bretland aftur komið í Evrópusambandið eða á hraðleið inn í það.
Hlusta má að viðtalið í spilaranum hér að neðan.
Fyrir Brexit kenndu Bretar Evrópusambandinu um allt sem aflaga fór í Bretlandi. Tíu árum síðar hefur ástandið frekar versnað en hitt og nú er Brexit kennt um allt, segir Jón Daníelsson prófessor. Nú vill meirihluti Breta aftur inn í Evrópusambandið.